Showcooking sobre vexetais de marisma do chef Alberto Lareo

O chef Alberto Lareo, ex alumno do noso centro e actual propietario do restaurante Manso de Santiago de Compostela, protagonizou un showcooking-cata centrado na cociña con algas, unha das súas especialidades. Nesta clase maxistral, enmarcada nos actos do 50 aniversario do CIFP Compostelao cociñeiro contou  co apoio de Antonio Muiños, copropietario da empresa galega Porto Muiños, pioneira na comercialización de algas.

O acto, que se desenvolveu na aula de I+D+i da escola, foi seguido por unhas 40 persoas entre alumnos, ex alumnos e persoal relacionado co mundo da restauración e a gastronomía. Antonio Muiños explicou o funcionamento da súa compañía, así como da evolución e o éxito comercial dos seus produtos, do proceso de produción das algas dende a súa recollida nas costas galegas ata chegar aos pratos de comensais de toda España e Europa. O empresario fixo especial fincapé no valor nutricional e culinario destes vexetais de marisma, cada vez máis importantes na nova cociña galega.

Ao longo das dúas horas que durou a cata, Alberto Lareo elaborou en directo varios pratos, incluíndo a sobremesa. En todos eles, as verduras, o peixe e as froitas compartiron protagonismo coas algas, combinando sabores e texturas con esencia atlántica.

Celebración do 50 aniversario

As actividades programadas polo 50 aniversario da escola de Lamas de Abade finalizarán no mes de novembro. Este mes de maio é o último con eventos programados antes do parón estival. O vindeiro martes 30 terá lugar unha conferencia sobre ‘O éxito empresarial en restauración. A figura do chef emprendedor’, na que se analizarán varios casos de éxito ligados a cociñeiros de renome: Sergi Arola, Pepe Vieira, do restaurante Pepe Vieira & Ultramar; e Yago Pazos e Marcos Cerqueiro, do Abastos 2.0 & Barra Atlántica. En outubro e novembro, continuarán as charlas e os showcooking-cata en directo.

Éxito da cata maridada con viños Ribera del Duero

Case un cento de persoas, entre alumnos, profesores e profesionais relacionados co mundo da restauración e a hostalería asistiron o luns o o martes a unha cata maridada con viños Denominación de Orixe Ribera del Duero. A xornada enmárcase como un dos actos que o CIFP Compostela organiza co gallo do 50 aniversario do centro. As catas deron comezo cunha exhaustiva explicación das características destes viños por parte de Alberto Tobes, técnico do Consello Regulador, quen falou da tipicidade dos seus viños e as técnicas de cultivo e de elaboración.

Despois da parte máis teórica, levouse a cabo unha maridaxe con viños da D.O. Ribera del Duero. Elaboráronse os seguintes pratos: Lomitos de caballa ao forno sobre pisto, Tosta de pan galego con salmón afumado sobre cremoso de queixo, Guiso de fabas de Lourenzá con morcilla e touciño, Coxa de coello á cazadora (bacon, pataca parisien, champiñóns e un caldo ou fondo de hortalizas), Pequeno entrecôtte de Tenreira Galega á pementa negra con pataca ponte nova, Rabo de Tenreira Galega estofado con crema de pataca de Galicia, e Mousse de chocolate negro sobre biscoito de avelá e coulis de froitas vermellas (amorodos e moras).

Os pratos foron maridados acompañando aos viños xenéricos do Consello Regulador da D.O. Ribera del Duero: viño tinto xoven, viño tinto xoven en barrica, viño tinto crianza, viño tinto reserva, viño tinto Gran reserva e viño de autor.

Alberto Tobes explicou que o obxectivo era doble: Buscar o mellor bocado con cada viño e comprobar, “cos viños diante, cal combina mellor con cada prato”. O motivo de que foran viños sen etiqueta de adega débese a que o Consello Regulador, ademais de ter viños propios, “non pode promocionar unha adega concreta”, senón a todas as que integran o organismo.

Máis actividades

Este mes de maio o CIFP Compostela acollerá outro showcooking-cata, que impartirá o cociñeiro Alberto Lareo, do restaurante Manso de Santiago de Compostela, sobre a Cociña das Algas. As actividades do 50 aniversario do centro programadas para maio finalizarán o día 30 con relatorios de catro dos grandes cociñeiros nacionais, que tratarán a figura do chef emprendedor: Sergi Arola, Pepe Vieira, do restaurante Pepe Vieira y Ultramar; e Yago Pazos e Marcos Cerqueiro, do Abastos 2.0 & Barra Atlántica.

As tres empresas máis importantes de intermediación hostaleira analizan o sector desde Compostela

O salón de actos do CIFP Compostela acolleu un intenso e interesante debate sobre as empresas de intermediación en hostalería. Sobre o escenario estiveron representantes das tres empresas máis importantes de España no ámbito da  intermediación hostaleira: Atrápalo, ElTenedor e restaurantes.com. Durante máis de dúas horas explicaron cal é o presente e o futuro das empresas de intermediación, e como traballan para axudar aos restaurantes e os potenciais clientes. Estas ponencias enmárcanse dentro das actividades que o noso centro está a organizar para conmemorar o 50 aniversario.

Os numerosos asistentes ás charlas tiveron a  oportunidade de escoitar a Alejandro Lorenzo, socio cofundador de ElTenedor, unha empresa que naceu en Francia no ano 2006 e que actualmente xa está presente en máis de 11 países do mundo. Lorenzo explicou como foi a evolución do mercado e como a súa compañía traballa diariamente para facilitarlle aos usuarios a tarefa de “descubrir e reservar o restaurante perfecto”. O responsable de ElTenedor tamén falou do seu traballo cos restaurantes, cos que colabora para “facer crecer o seu negocio” e sobre a reputación online, que considera  “o altofalante máis grande do mundo”.

Antonio Fernández Ruiz, fundador e CEO de restaurantes.com, aproveitou a súa presenza en Santiago para falar da tecnoloxía e do márketing postos ao servizo do restaurante. Fernández Ruiz afirmou que o mercado español é “un dos máis fragmentados de Europa, coa penetración tecnolóxica máis baixa” pero que, aínda así, existe unha enorme oportunidade “para procesar o mercado de turistas desde os seus países de orixe”, algo para o que o teléfono “segue sendo un elemento crave do éxito”.

 A última relatora do día foi Helena Perelló, responsable de comunicación de Atrápalo. Na súa intervención, na que non faltou a música a cargo dunha guitarra, afirmou que o principal obxectivo da súa empresa “é que todo o mundo poida gozar do seu tempo libre”. Neste senso, a representante de Atrápalo explicou brevemente como todo o equipo se adica a “atopar e vender plans interesantes a prezos económicos”.  Para Perelló a restauración é unha das partes máis demandados na intermediación.

 

Outras actividades do 50 aniversario

As actividades conmemorativas do 50 aniversario do CIFP Compostela continuarán durante todo o mes. O día 15, o centro acollerá unha cata maridada protagonizada pola Denominación de Orixe Ribera del Duero. O martes 23, o protagonista será o cociñeiro galego Alberto Lareo, do compostelán Restaurante Manso, para realizar un showcooking sobre a cociña con algas.

Por último, o 30 de maio tres dos grandes cociñeiros nacionais darán unha ponencia sobre a figura do chef emprendedor. Falarán Sergi Arola, sobre ‘Marca personal’, Pepe Vieira, do restaurante Pepe Vieira e Ultramar; e Yayo Pazos e Marcos Cerqueiro, do Abastos 2.0 & Barra Atlántica.

As actividades retomaranse despois del periodo estival. En outubro e novembro haberá máis ponencias e catas en directo. Podedes consultar toda a programación na web http://50cifpcompostela.com/es/

Expertos en márketing hostaleiro destacan a importancia das novas tecnoloxías no éxito empresarial

O salón de actos do CIFP Compostela acolleu o primeiro dos relatorios organizados con motivo do 50 aniversario do centro. Máis dun centenar de persoas, entre alumnos, ex alumnos, profesionais e amantes do mundo da restauración déronse cita para escoitar a tres dos máis importantes expertos nacionais en márketing hostaleiro.

Diego Coquillat investiga o proceso de transformación dixital da hostalería, e actualmente dirixe a axencia SMRestauranting. O profesor na Universidade de Alacante, a UNED, a Escola Chicote e o Basque Culinary Center explicou que “nos enfrontamos a un novo cliente, hiper conectado, informado e moito máis esixente. A tecnoloxía permítelle acceder a información onde e cando quere” polo que “xa non están limitados ao espazo físico de mesas e cadeiras”. Coquillat lanzou unha mensaxe moi clara: “É vital para a supervivencia do sector entender que a tecnoloxía permite que o cliente sexa cliente moito antes de ir ao restaurante, e que non deixa de selo unha vez que se marcha”.

Daniel Iglesias foi outro dos protagonistas da xornada. Experto na creación de estratexias de comunicación na internet, fundador de Soyunamarca.com e organizador do Congreso “Gastromarketing“, explicou aos asistentes cal pode ser o uso do márketing en tempo real, “axudando a usuarios de redes sociais a atopar un restaurante xusto cando o necesita”. O obxectivo é, segundo afirmou, que os negocios poidan “mellorar a súa reputación con accións creativas e ferramentas online” que cativen e ofrezan valor engadido aos clientes.

Erika Silva, fundadora da Escola de Márketing Gastronómico Online, explicou os cambios de futuro na xestión dos restaurantes e lembrou que, na actualidade, “dous de cada tres consumidores buscan produtos que lles proporcionen un estilo de vida saudable”. Para ela, o obxectivo que debe marcarse todo empresario é “facer soñar ao cliente, inspiralo” e lembrou que, en 2016, sacáronse máis fotos que nos últimos 100 anos, moitas delas de suxestivos pratos de comida.

Os actos do 50 aniversario continuarán durante os meses de maio, outubro e novembro. A seguinte cita do programa será un relatorio sobre o ‘Futuro da intermediación na hostalería’, onde falarán responsables das empresas Atrápalo.com e ElTenedor. Tamén están organizados para o mes que vén dous Showcooking-Catas a cargo da Denominación de Orixe Ribera del Duero o e do chef Alberto Lareo, do restaurante Manso de Santiago, centrado na cociña das algas.

Martín Berasategui empraza os estudantes a ser perserverantes, inconformistas e actuar con ambición sa

Inauguración 50 CIFP Compostela

O Centro Integrado de Formación Profesional (CIFP) Compostela celebra o seu 50 aniversario convertido hoxe nun referente nacional e internacional nos estudos de FP de Hostalería e Turismo. O conselleiro de Cultura, Educación e Ordenación Universitaria, Román Rodríguez, presidiu  acto central desta conmemoración, que contou coa presenza como invitado especial do chef Martín Berasategui; ambos acompañados do director do centro, Ramiro Esparís; e do director xeral de Educación, FP e Formación Profesional, Manuel Corredoira.

Martín Berasategui destacou que o avance acadado no eido gastronómico non sería posible sen a existencia de centros de formación coma o CIFP Compostela. Tras subliñar que a orixe da actual cociña comeza polas materias primas que proporciona a natureza, emprazou aos estudantes do centro a ser perseverantes, inconformistas e actuar con “ambición sa” para seguir medrando na súa profesión.

Na súa intervención, o conselleiro Román Rodríguez destacou o CIFP Compostela como centro precursor do ensino da Hostalería en España, cuxas ensinanzas foron unha constante e un sinal de identidade ao longo destas cinco décadas. Segundo o conselleiro, o seu proxecto pedagóxico encaixa á perfección no modelo de formación profesional que estamos a desenvolver para a vindeira década.

O responsable de Educación do Goberno galego aproveitou para agradecer o traballo desenvolvido por este centro e a súa constante aposta pola innovación e pola calidade, unha traxectoria avalada polos numerosos premios acadados polo seu alumnado en múltiples competicións (Galiciaskills, Spainskills, Euroskills, Innova FP).

Precisamente, en referencia aos estudantes que están e que pasaron por este CIFP (nove deles foron recoñecidos con estrelas Michelin), o conselleiro amosou o orgullo de contar cuns profesionais preparados, emprendedores e de prestixio cuxa formación académica e traxectoria profesional contribúe a reforzar un sector estratéxico e con gran potencial en Galicia, como é o da Hostalería, e, sobre todo, “a dignificar a profesión”.

Fomentar o emprendemento

Aproveitando a celebración deste 50 aniversario, quedou inaugurado o viveiro de empresas do centro, que comezará a funcionar de xeito inmediato, e cuxa finalidade é o asesoramento ao alumnado para a creación de empresas. O viveiro, ao que a Consellería destinou 20.000 euros para adecuación das instalacións e dotación de mobiliario, dispón de tres espazos para emprendedores e unha sala de reunións. Un viveiro que -segundo recalcou o conselleiro Román Rodríguez- “será clave para fomentar o emprendemento, un dos desafíos da nova estratexia da FP para a vindeira década”.

A dotación deste espazo, xunto coa reforma dos talleres de cociña, tamén inaugurados, supuxo un investimento de máis de medio millón de euros neste centro por parte da Consellería de Cultura e Educación.

Os actos programados do 50 aniversario do CIFP Compostela continuarán durante os meses de abril, maio, outubro e novembro, coa celebración de talleres de cociña en directo e mesas redondas onde se abordarán temas tan variados como as novas tecnoloxías aplicadas á gastronomía, a impresión 3D, o marketing ou a intermediación en hostalería, entre outros. Dado que o aforo é reducido, os interesados en asistir ás ponencias deberán tramitar unha inscrición gratuíta a través da web do propio centro: www.50cifpcompostela.com .

Ademais do conselleiro de Cultura e Educación, Román Rodríguez; e do recoñecido cociñeiro donostiarra Martín Berasategui; o acto de hoxe contou coa presenza de antigos alumnos do centro, moitos deles prestixiosos cociñeiros ou persoal de sala que tamén é un referente no sector; e outros que agora son docentes en centros de hostalería de Galicia e de fóra de Galicia.

Os inicios

A orixe do actual CIFP Compostela data do ano 1967, ano en que comeza como Escola de Hostalería no Burgo das Nacións. Tras un breve período no actual Politécnico, desde o ano 1973 ocupa a actual sede en Lamas de Abade. Dez anos despois pasa a formar parte da rede de institutos de FP dependentes do Ministerio de Educación ata converterse en Centro Integrado en 2003.

Aínda que mantendo os estudos de Hostalería e Turismo, en 2006 o centro ampliou as súas instalacións coa construción dun novo edificio para acoller os ciclos das familias profesionais de Servizos socioculturais e á comunidade e de Artes Gráficas. A día de hoxe acolle a un total de 1.087 alumnos, dos cales 656 son da familia de Hostalería e turismo.

Ademais, forma parte da Rede Galega de Formación Profesional de Hostalería, constituída por oito centros que xeran un espazo dinámico, innovador e orientado a impulsar un sector clave na economía galega.

O chef Martín Berasategui na inauguración dos actos do 50 aniversario do CIFP Compostela

Cifp Compostela Lamas de Abade

O Centro Integrado de Formación Profesional (CIFP) Compostela conmemora este ano o 50 aniversario da súa orixe cunha ampla axenda de actividades. O acto de inauguración terá lugar o 18 de abril e estará presidido por Román Rodríguez, Conselleiro de Cultura, Educación e Ordenación Universitaria, e contará coa presenza do chef Martín Berasategui, que suma 8 estrelas Michelin.

O cociñeiro donostiarra conta con 41 anos de experiencia no oficio e é o primeiro chef con dous restaurantes triestrelados na Guía Roja en España. A súa ‘casa nai’ atópase na localidade vasca de Lasarte-Oria, e en Barcelona podemos disfrutar dos seus pratos no restaurante Lasarte.

Entre as actividades organizadas polo CIFP, que se desenvolverán durante os meses de abril, maio, outubro e novembro, podémonos atopar con talleres de cociña en vivo e mesas redondas nas que participarán grandes profesionais do mundo da gastronomía. Tamén se dialogará sobre as novas tecnoloxías aplicadas ao mundo gastronómico, a impresión 3D e os avances científicos relacionados con esta materia.